ກ່ຽວກັບການເລືອກຕັ້ງ ປີ 2024

ກ່ຽວກັບການເລືອກຕັ້ງ ຄະນະບໍລິຫານງານ ສະມາຄົມອະດີດນັກສຶກສາລາວຈາກປະເທດຍີ່ປຸ່ນ ຊຸດທີ VIII

ຄະນະບໍລິຫານງານ ສະມາຄົມອະດີດນັກສຶກສາລາວຈາກປະເທດຍີ່ປຸ່ນ ຊຸດທີ VII ຂໍຖືເປັນກຽດ ຮຽນມາຍັງ ສະມາຊິກຂອງສະມາຄົມ ຊາບວ່າ: ຄະນະບໍລິຫານງານ ຊຸດທີ VII ໄດ້ຮັບການແຕ່ງຕັ້ງຕາມຂໍ້ຕົກລົງ ເລກທີ 03/ສມລ-ຍ ລົງວັນທີ 25 ມິຖຸນາ 2020, ແລະ ແຕ່ງຕັ້ງເພີ່ມຕື່ມຕາມຂໍ້ຕົກລົງ ເລກທີ 04/ສມລ-ຍປ ລົງວັນທີ 22 ທັນວາ 2022 ເປັນຕົ້ນມາ, ຄະນະບໍລິຫານງານ ກໍ່ໄດ້ນໍາພາສະມາຊິກ ຈັດຕັ້ງປະຕິບັດກິດຈະກໍາຕ່າງໆ ເພື່ອເສີມສ້າງຄວາມສາມັກຄີພາຍໃນ, ປະກອບສ່ວນໃນການພັດທະນາເສດຖະກິດ-ສັງຄົມ ແລະ ເສີມສ້າງສາຍພົວພັນອັນດີງາມລະຫວ່າງ ລາວ-ຍີ່ປຸ່ນ ອາຊຽນ-ຍີ່ປຸ່ນ ຕາມການຊີ້ນໍາຂອງ ສະມາຄົມມິດຕະພາບ ລາວ-ຍີ່ປຸ່ນ.

ໃນເດືອນພຶດສະພາ 2024 ຈະມາເຖິງນີ້, ຖືວ່າ ຄົບ 4 ປີ ທີ່ຄະນະບໍລິຫານງານ ຊຸດທີ VII ໄດ້ຮັບມອບໝາຍໜ້າທີ່, ແລະ ອີງຕາມຜົນກອງປະຊຸມກັບຄະນະທີ່ປຶກສາຂອງສະມາຄົມ ແລະ ການເຫັນດີພາຍໃນ ຄະນະບໍລິຫານງານ ຊຸດທີ VII: ໃນການຕັ້ງອາຍຸວາລະຂອງການເປັນ ຄະນະບໍລິຫານງານ ເປັນ 3 ປີ, ແລະ ການທາບທາມຄັດເລືອກຄະນະບໍລິຫານງານ ໃນເດືອນມີນາ-ເມສາ ປີ 2024 ແລະ ຈັດງານພົບປະຈໍາປີ ປີ 2024 ໃນຕົ້ນເດືອນພຶດສະພາ ປີ 2024 ທີ່ເປັນມື້ຄົບຮອບການສ້າງຕັ້ງສະມາຄົມ ຄົບຮອບ 23 ປີ; ຈະກໍານົດບັນດາເນື້ອໃນເຫຼົ່ານີ້ເຂົ້າໃນຮ່າງກົດລະບຽບຂອງສະມາຄົມ ທີ່ຢູ່ໃນຂັ້ນຕອນສ້າງເປັນຮ່າງ ໃຫ້ສະມາຊິກຮັບຮອງ ແລະ ນໍາສະເໜີຂໍອະນຸມັດຢ່າງເປັນທາງການ ໃນຂັ້ນຕໍ່ໄປ.

ໃນນາມຄະນະບໍລິຫານງານຂອງສະມາຄົມ ຈິ່ງຂໍສະເໜີ ຈັດການທາບທາມຄັດເລືອກຄະນະບໍລິຫານງານ ຊຸດໃໝ່ ເຊິ່ງຈະເປັນຊຸດທີ VIII ຂອງ ສະມາຄົມອະດີດນັກສຶກສາລາວຈາກປະເທດຍີ່ປຸ່ນ, ໃນຮູບແບບທາບທາມ ປະກາດຮັບສະໝັກ ແລະ ປ່ອນບັດຄັດເລືອກຈາກສະມາຊິກ. ຫຼັງຈາກສະຫຼຸບຜົນຂອງການຄັດເລືອກ ຄະນະບໍລິຫານງານຊຸດໃໝ່ ແມ່ນຈະຂໍສະເໜີແຕ່ງຕັ້ງ ຢ່າງເປັນທາງການ ໃນຂັ້ນຕໍ່ໄປ.

ຜ່ານການປະກາດຮັບສະໝັກຜູ້ລົງສະໝັກ ວັນທີ 11-24/10/2024, ມີບັນດາສະມາຊິກ ສະມາຄົມໃຫ້ຄວາມສົນໃຈ ແລະ ລົງສະໝັກທັງຫມົດ 12 ທ່ານ ແຕ່ເນື່ອງຈາກ 1 ທ່ານໄດ້ຂໍຖອນໂຕ ຈິງຍັງເຫຼືອ 11 ທ່ານ ເປັນຍິງ 6 ທ່ານ ດັ່ງມີລາຍຊື່ດັ່ງນີ້: ທ່ານນາງ ສົມສະຫງວນ ສິງທຽມພອນ, ທ່ານນາງ ວັນມະນີ ຈັນງາຄຳ, ທ່ານນາງ ພຸດສະດາ ຈອນເພັດສະລາດ, ທ່ານນາງ ບົວສອນ ວົງຖາວອນ, ທ່ານ ນິລັນດອນ ບຸນຍົງ, ທ່ານນາງ ສຸກສະຫວັນ ຈັນທອງສີ, ທ່ານ ທອງຂັນ ແກ້ວແກ່ນຈັນ, ທ່ານ ຈິດຕະວົງ ແກ້ວມະນີວົງ, ທ່ານ ບຸນເຮັງ ສຸດທິຈັກ, ທ່ານນາງ ປຣັງດາລາ ອິນທະວົງ, ທ່ານ ໂພໄຄສະຫວັນ ໂພທິສານ

ຂັ້ນຕອນຂອງການເລືອກຕັ້ງຈະແມ່ນ ການປ້ອນບັດລົງຄະແນນສຽງທາງອອນລາຍ ເຊິ່ງຈະໃຫ້ສະມາຊິກຄັດເລືອກເອົາ ຜູ້ສະໝັກໃດທີ່ຄິດເຫັນວ່າເໝາະສົມທີ່ສຸດ 7 ທ່ານ ຈາກ 11 ທ່ານ, ຫຼັງຈາກໄດ້ຄະແນນລວມແລ້ວ ຈະແມ່ນຄັດເລືອກເອົາ 7 ທ່ານທີ່ໄດ້ຄະແນນສູງກວ່າໝູ່ ເປັນ ຄະນະບໍລິຫານງານ ສະມາຄົມ ຊຸດທີ VIII ເພື່ອແຕ່ງຕັ້ງຢ່າງເປັນທາງ ໃນຂັ້ນຕໍ່ໄປ.

ໂຄງຮ່າງການຈັດຕັ້ງ ຄະນະບໍລິຫານງານ ສະມາຄົມອະດີດນັກສຶກສາລາວຈາກປະເທດຍີ່ປຸ່ນ ຊຸດທີ VIII

ຄະນະບໍລິຫານງານ ສະມາຄົມອະດີດນັກສຶກສາລາວຈາກປະເທດຍີ່ປຸ່ນ ຊຸດທີ VIII ຈະປະກອບດ້ວຍ 7 ທ່ານຄື່: ປະທານ, ຮອງປະທານ 2 ທ່ານ, ເລຂາທິການ ແລະ ກໍາມະການ 3 ທ່ານ.

ເງື່ອນໄຂການເປັນຄະນະປະທານ ໂດຍສະເພາະປະທານ ຄະນະບໍລິຫານງານ ສະມາຄົມອະດີດນັກສຶກສາລາວຈາກປະເທດຍີ່ປຸ່ນ

1. ເປັນສະມາຊິກ ສະມາຄົມ ທີ່ມີປະສົບການໃນການເປັນຄະນະບໍລິຫານງານ ສະມາຄົມ;

2. ມີບົດບາດໃນການເສີ່ມສ້າງສາຍພົວພັນມິດຕະພາບ ລາວ-ຍີ່ປຸ່ນ;

3. ມີສ່ວນຮ່ວມໃນກິດຈະກໍາຂອງ ASCOJA, ASJA.